LAOAG CITY – Naikeddeng a bumisita iti Pilipinas ti maibilang a Pickleball World No. 1 a ni Anna Leigh Waters intono Oktubre para iti maisayangkat a Franklin Asia Pickleball Showcase.
Ti Pilipinas ti napili a kaunaan a destinasyon ti nasao a world showcase sakbay a maipatungpal iti sabali a pagilian iti Asya kas ti Malaysia, Hong Kong, ken Vietnam.
Inrakurak dagiti organizers a ti pagilian ti agdama a makairekrekord ti kaalistoan a panagdur-as iti benneg ti pickleball iti intero a lubong kalpasan a nakairehistro ti impresibo a 1,213% year-over-year growth rate.
Gapu iti kaalisto ti panagado dagiti umaayam ken agkalikagom a mapapigsa daytoy, inkabil da ti Pilipinas iti tuktuk dagiti kangrunaan a prayoridad na para iti global expansion.
Namnamaen a mangipaay ti dakkel nga inspirasyon kadagiti lokal nga atleta a Pilipino ti ibibisita ken panagpabuya ti world number one player a ni Waters intono sumaruno a bolan.
