LAOAG CITY – Naipasyar ditoy ciudad ti Laoag ti pilgrim image ti Our Lady of Guadalupe manipod Mexico a nagbalin nga oportunidad iti nainspiritoan a pannakapabileg ti pammati dagiti residente ditoy probinsya.
Ti pannakaipasyar ti pilgrim image ti Our Lady of Guadalupe ket mangipalagip iti pammati, namnama ken ayat ti Diyos.
Immuna a naikabil ti imahe iti Laoag City Hall nga inatendaran dagiti opisyal ditoy ciudad nga indaulwan da Mayor James Bryan Alcid ken Vice Mayor Rey Carlos Fariñas.
Simmaruno a nakaikabilan ti imahe iti Saint William Cathedral a nakaiwayatan ti misa kas panangraem ti Our Lady of Guadalupe.
Maysa ti Laoag City a destinasyon ti Pilgrim Image a maibilang a naisangsangayan gapu ta paset ti siudad ti Global Novena Intercontinental Guadalupana para ti maika-500 nga anibersario ti Marian apparitions wenno panagpakita ti Our Lady of Guadalupe ken ni San Juan Diego iti Tepeyac Hill, Mexico idi 1531.
