LAOAG CITY – Maikabil ditoy Pilipinas ita a tawen ti pilgrim relic ni Blessed Carlo Acutis a madutokan kas kaunaan a millennial saint ti Simbaan Katolika ita nga aldaw Septiembre 7.
Basar iti Friends of Blessed Carlo Acutis – Philippines, ti replika a paset ti pericardium wenno fibrous sac a mangprotehir iti puso ket adda ditoy pagilian manipud inton Nobiembre 28 agingga iti Disiembre 15.
Kinumpirmaran ti Assisi–Nocera Umbra–Gualdo Tadino, ti home diocese ni Acutis, ti panagbisita ken intalekna iti Friends of Blessed Carlo Acutis – Philippines ti panangimaton ti pilgrimage.
Naammoan a ni Acutis a nabigbig iti panagusar ti teknolohia tapno maitandudo ti pammati ket pimmusay gapu iti leukemia idi 2006 iti tawenna a 15.
Kabayatanna, madutokan daytoy kas kaunaan a millennial saint iti canonization-na ita nga aldaw.
