Inreport ti Department of Health (DOH) nga agkurkurang ti Pilipinas iti 190,000 a healthcare workers ditoy pagilian.
Iti press briefing ti Malacañang, kinuna ni Health Secretary Ted Herbosa a maysa kadagiti kangrunaan a rason ti kinakurang ti health workers ket gapu iti panagakar ken panagbalin nga Overseas Filipino Worker (OFW) dagiti healthcare workers.
Maibasar iti datos nga inted ni Migrant Worker Secretary Hans Leo Cacdac, 74% kadagiti healthcare workers a pumanaw iti pagilian ket nars.
Mainaig iti daytoy, inlanad ti Department of Health ti solusyon kenni Presidente Ferdinand Marcos Jr., tapno mataming ti dakkel a kinakurang ti human resources iti healthcare sector, babaen ti National Human Resources Master Plan 2020-2040.
Kabayatanna, karaman ditoy ti panangipaay iti health insurance, balay ken scholarship para kadagiti health workers.
