Inpakaammo ti Department of Health (DOH) nga agtaltalinaed a nababa ti risgo ti Pilipinas iti COVID-19 nupay umad-adu ti kaso iti sangalubongan ti baro a “FLiRT” variant.
Naiget ti panangmonitor ti ahensia iti kasasaad ken ibilangna a saan pay a kasapulan ti travel restrictions.
Segun iti datos ti ahensia, manipud Mayo 14 agingga iti Mayo 20, 202 laeng ti promedio nga inaldaw a kaso ti COVID-19, nababbaba ngem iti naudi a datos a 500 a kaso ken idi napan a tawen a dimmanon iti 1,750.
Mainaig iti daytoy, manipud kadagiti baro a naipadamag a kaso, sangapulo ket innem ti kritikal, ken 12 ti natay.
Inpaganetget ti nadakamat nga ahensia nga awan pay ti pammaneknek a ti KP.2 KEN KP.3 variants ket mangpataud iti nakaro a sakit, iti laksid daytoy, maidagdagadag pay laeng ti publiko nga agusar iti face mask, agbuggo iti ima, ken mangmantener iti physical distancing.
