LAOAG CITY – Nakasaganan ti Government Service Insurance System (GSIS) iti panagtitipon dagiti industry leader ken pannakabagi dagiti institusion ti social security iti maika-41 nga ASEAN Social Security Association (ASSA) Meetings a maangay inton Nobiembre 25 agingga iti Nobiembre 27, 2024 no sadinno a ti Pilipinas ti mangsangaili ita a tawen.
Agserbi met kas ASEAN Social Security Association Vice Chairperson ni Government Service Insurance System President ken General Manager Jose Arnulfo Veloso.
Ti panggep ti nasao a miting ket tapno maitandudo ti kaadda ti komprehensibo ken agpartuat kadagiti inclusive social security protection iti rehion nga idauluan dagiti ASEAN leaders.
Segun kenni Veloso, mabalin a maibilang daytoy a gundaway tapno maipakita ti liderato ti Pilipinas iti panangsukog ti social security para kadagiti mangmangged iti pagilian.
Kabayatanna ti Philippine Social Security Association (PhilSSA) ket buklen ti Philippine Charity Sweepstakes Office (PCSO), Government Service Insurance System (GSIS), Social Security System (SSS), Philippine Health Insurance Corporation (PhilHealth), Home Development Mutual Fund (Pag-IBIG Fund), ken Employees’ Compensation Commission (ECC).
