LAOAG CITY – Ikonkonsiderar ti Pilipinas ti panagangkat ti langis manipud idiay Russia kas ti paset ti panangbirbiruk kadagiti baro a pangalaan ti fuel supply basar iti Department of Foreign Affairs (DFA).
Daytoy nga addang ket gapu iti gagem a maipababa ti lokal a presio ti langis ken masigurado ti suplay idinto a 98% ti krudo ti pagilian ket agdama nga aggapu iti Middle East nga apektado ti gubat iti nagbaetan ti Estados Unidos, Israel ken Iran.
Kitkitaen ti Russia kas potensial a supplier tapno maipababa ti presio ti petrolyo iti merkado.
Inbatad ni Energy Secretary Sharon Garin, nakikoordinaren ti ipatpataray ti estado a Philippine National Oil Company (PNOC) iti Russian oil nupay saan pay a natalantan dagiti detalye iti posible a kaadu wenno kabayag ti suplay.
Iti agdama, segun iti sekretario, maiyur-uray pay laeng ti sungbat ti Russia.
Malaksid iti daytoy, manarimaan pay ti pannakikoordinar ti pagilian kadagiti dadduma nga exporters kas iti Thailand, Japan ken Singapore tapno masigurado ti umdas a suplay kabayatan nga agtaltalinaed ti pabaliw-baliw a presio iti world market.
