LAOAG CITY – Karaman ti Pilipinas iti 95 a pagilian a nagpirma iti international declaration a gagem na a maparmek ti global plastic pollution.
Ti nasao a declaration ket naawagan a “Nice Call for an Ambitious Treaty on Plastic Pollution,” a naiyuswat idi Hunyo 10 iti maikadwa nga aldaw ti United Nations Ocean Conference idiay Nice, France.
Gagem ti nasao a dokumento ti mangituding ti “global target” tapno makissayan ti produksyon ken panagusar kadagiti kangrunaan a plastic polymers.
Karaman ditoy ti panagkiddaw ti obligasyon kadagiti kaalyado a pagilian tapno in-inot a maikkat dagiti problema ti plastic products ken chemicals, karaman ti pannakapasayaat dagiti disenyo dagiti plastic tapno maalay-ayan ti epekto daytoy iti aglawlaw.
Segun ken ni Agnès Pannier-Runacher, French Minister for Ecological Transition, ti nasao nga addang ket balligi a declaration sakbay a mangrugi ti negosasyon para iti ”end to plastic pollution” a maiyuswat idiay Geneva intono Agosto 5 agingga iti 14, 2025.
Maipalagip nga idi Marso 2022, nangipasa ti United Nations Environment Assembly ti maysa a resolusyon para iti maysa a global treaty a mangsolbar iti intero a lifecycle iti plastik.
