LAOAG CITY – Agbinnulig ti Pilipinas ken Japan para kadagiti maipasdek nga high-ticket infrastructure projects ken dagiti critical projects ditoy pagilian.
Karaman kadagiti pinirmaan a katulagan ti dua a pagilian ket ti budget support iti health ken climate initiatives ti gobierno ti Pilipinas.
Indauloan ni Finance Secretary Ralph Recto kaduana dagiti nangangato a senior officials ti Japan ti pormal a panagpirma iti katulagan.
Basar iti katulagan, maaddaan ti pundo ti Davao Bypass Construction Project nga addaan ti pakabuklan a gatad a dumanon iti P17.67 bilyon.
Daytoy a proyekto ket gagem a patibkeren ti mobility dagiti Dabawenyo a makatulong tapno dumur-as ti ekonomia ti Mindanao.
Naammoan a karaman pay kadagiti mapundoan a proyekto ket ti Pasig Marikina River Channel Improvement Project Phase IV, Cavite Industrial Area Flood Risk Management Project and Climate Change Action Program ken ti Build Universal Health Care Sub Program 2.
