LAOAG CITY – Kinondenar ti Pilipinas ti kaudian a ballistic missile launch ti North Korea.
Immuna nga inruar ti state media ti North Korea a nangisayangkat ti nasao a pagilian ti test fire kadagiti dua a ballistic missile idi Lunes, Hulio 1.
Ti inaramid a test fire ket inpadamag met ti South Korea ngem basar iti militar daytoy, saan a nagbalin a normal ti panagtayab ti maysa kadagiti missile.
Basar iti opisial a rakuark ti Department of Foreign Affairs, ti baro a panagpatayab ti missile ket mangpakaro laeng iti tension iti Korean Peninsula ken iti lndo-Pacific region.
Inpetteng ti ahensia, maap-apektar ditoy ti economic progress, kinakappia ken kinatibker ti nasao a rehion.
Maibasar iti Department of Foreign Affairs, addan ti sumagmamano a daras nga immapela ti Pilipinas iti North Korea a sumurot kadagiti international obligations daytoy ken ti panangsurot kadagiti maiyannatop a resolusion ti United Nations Security Council.
Kiniddaw ti ahensia iti North Korea a sumrek lattan iti constructive ken nakappia a panagsasarita pakairamanan ti Republic of Korea wenno South Korea.
Maibasar iti immuna nga statement ti Joint Chiefs of Staff ti North, dua a missile ti pinaruk-atanen nga addaan ti sangapulo a minuto a nagbaetan manipud iti ili ti Jangyon iti Southeastern North Korea.
Kabayatanna, ti umuna a missile ket maibagbaga a timmayab iti 600 a kilometro idinto ti maikadua a missile ket timmayab iti 120 a kilometro ngem saanen a nadakamat no sadino a lugar a bimmagsak.
