LAOAG CITY – Agrigrigat ti Philippine healthcare system gapu iti kinakurang ti 27,500 a registered pharmacists ken ti dakkel a karit iti availability kadagiti pharmacy kadagiti sumagmamano a lugar iti pagilian.
Basar iti Private Sector Advisory Council (PSAC) mainaig iti situasion, dinakamatna ti datos manipud iti 8th Healthcare Sector kaduana ni Presidente Ferdinand Marcos Jr. iti Palasyo ti Malakanyang.
Nakasentro ti taripnong iti reporma iti pagannurotan ken strategic initiatives tapno papigsaen ti ‘healthcare accessibility ken resilience.’
Idi October 2021 interview, iti panawen ti COVID-19 pandemic, inrakurak ti Department of Health (DOH) a sumangsango ti Pilipinas iti panagkurang ti 14 a ribu a Pharmacists malaksid pay kadagiti doktor, nars ken dadduma pay nga health care workers.
Naikumpara ti datos manipud iti Private Sector Advisory Council report ti kinakurang ti bilang ti Pharmacists iti pagilian ket makitkita nga agkurkurang.
Naammoan a tapno masolbar ti problema, inbatad ti Private Sector Advisory Council a suportado daytoy ti panangpalawa iti community pharmacies kangrunaanna iti ‘underserved regions’ tapno mapasayaat ti access dagiti Pinoy kadagiti napapateg a medisina.
