LAOAG CITY – Agtultuloy ti mapaspasamak a panag-bully kadagiti pagadalan ditoy Pilipinas nangruna iti Metro Manila, basar iti report ti Second Congressional Commission on Education (EDCOM II) iti baet kadagiti maipatpatungpal a linteg ken pagannurotan ket nagtalinaed daytoy a dakkel a parikot iti pagilian.
Basar iti 2018 Programme for International Student Assessment (PISA), 65% ti Grade 10 students iti Pilipinas ti nakapasar ti panang-bully iti sumagmamano a daras iti maysa a bulan, kangatoan iti amin kadagiti pagilian a nakipaset iti panagadal.
Apagapaman a bimmaba ti bilang iti 2022 Programme for International Student Assessment ngem maysa kadagiti tallo nga agad-adal latta ti agbalbalin a biktima iti kada lawas.
Sipod idi Nobiembre 2022 agingga idi Hulio 2024, adda ti 11% laeng ti naipadamag a kaso ti panag-bully ti nasolbar.
Kangatoan ti bilang iti Metro Manila, Calabarzon ken Central Luzon idinto a maysa laeng ti naipadamag iti Mimaropa, Bangsamoro ken Soccsksargen.
Basar iti Second Congressional Commission on Education, mabalin a gapu iti panagduma iti kinalaing ti reporting systems kadagiti nagduduma a rehion.
Malaksid iti pisikal a pannakadangran, inpetteng ti Second Congressional Commission on Education nga adda pay ti dadduma a klase ti panag-bully kas ti verbal, relational ken cyberbullying.
Ginutigotna a baliwan ti Implementing Rules and Regulations (IRR) ti Anti-Bullying Act of 2013 a maibilang a daanen ken saanen a maiyannatop iti agdama a panawen.
Gapu iti daytoy, nangbukel ti Second Congressional Commission on Education ti maysa a technical working group a bukbuklen dagiti opisial ti Department of Education, child protection advocates ken dagiti agsuksukisok iti edukasion.
Dinayaw met ni Education Secretary Sonny Angara ti panangikagumaan ti Second Congressional Commission on Education ken inpettengna ti kasapulan ket ibasar kadagiti reporma kadagiti addang ti gobierno tapno mapasayaat ti sistema ti edukasion iti pagilian.
