LAOAG CITY – Nangipeksa ti panagdanag ni Senador Raffy Tulfo iti agtultuloy a panagngato dagiti kaso ti bullying ditoy pagilian no sadinno a ti sumagmamano kadagitoy ket agtungpal iti panagpakamatay ken nagtalinaed ti Pilipinas a “bullying capital of the world.”
Iti panagdengngeg ti Senate Committee on Basic Education, dinakamat ni Tulfo ti kaso ti maysa nga estudiante nga adda ti rangkap ti bagina a naipadamag a nagpakamatay kalpasan a limmagto manipud iti maikapat a kadsaaran ti Quezon City Memorial High School.
Segun iti inana, rumrummuar a nakapasar ti ubing ti panang-bully sakbay napasamak ti insidente.
Inbatad ni Tulfo a makapadanagen ti situasion gapu ta saan a nagsardeng ti problema iti baet ti maipatpatungpal nga Anti-Bullying Act of 2013.
Basar iti datos, mapatta-patta a maysa iti kada tallo nga estudiante a Pilipino ti makapaspasar ti bullying iti inaldaw.
Manipud iti 1,158 a nairekord a kaso idi 2013 idi naipasa ti linteg ket umabot daytoy iti 20,000 idi 2018.
Gapu iti daytoy, insingasing ni Tulfo ti sumagmamano nga addang tapno malappedan ti bullying kadagiti pagadalan a nakailanad iti Senate Bill No. 441.
