LAOAG CITY – Naawaten ti Pilipinas ti dumanon iti 500,000 doses ti pentavalent vaccines a kabaelanna a mangprotehir kadagiti lima a sakit pakairamanan ti pertussis wenno whooping cough.
Basar iti Department of Health (DOH), simmangpet dagiti bakuna ditoy pagilian ita a bulan ken agdama nga adda iti cold storage kabayatan a maipinpinal pay laeng ti paperwork ken ipaay ti gobierno kadagiti health center iti intero a pagilian.
Malaksid iti pertussis, kabaelan pay ti bakuna a mangipaay ti proteksion kontra iti diphtheria, tetanus, hepatitis B ken haemophilus influenzae type b.
Saan met a dinakamat ti Department of Health no sadinno naggapoan dagiti bakuna ngem inrakurakna nga adda pay ti nayon pay a 750,000 doses daytoy a posible a sumangpet inton sumaruno a lawas.
Inbatad ni Health Secretary Teodoro Herbosa, inbilinnan kadagiti unit ti Department of Health a siguradoenda ti napaspas a pannakaipatulod kadagiti bakuna kadagiti government health centers.
Inpetteng ni Presidente Ferdinand Marcos Jr. a nupay bimmaban ti kaso ti pertussis, nasken latta nga agtultuloy ti routine vaccination tapno maliklikan ti panagngato ti kaso daytoy.
Basar iti report, kuna ti Department of Health a bimmaba dagiti mairekrekord a kaso ti pertussis sipod idi Hulio iti 50 a kaso iti kada lawas wenno manipud iti 300 a kaso iti kada lawas idi Abril.
