LAOAG CITY – Nakapastrek ti Pilipinas ti P712 bilyon iti turismo manipod Enero primero agingga iti Disyembre 15 ita a tawen.
Segun ken ni Department of Tourism (DOT) Secretary Christina Garcia-Frasco, umabot iti nasurok a 5.6 milyon a gangannaet ti immay bimmisita ditoy pagilian ita a tawen.
Kuna ni Frasco a nupay ti 2024 revenues ket nagkurang ti P3.36 trillion a nairekord idi 2023, agtultuloy a sumubsubbot ti industriya ti turismo.
Inrakurak na pay nga iti baet a ti foreign arrivals ket saan nga immabot iti 7.7 million target, nagtalinaed met a napigsa ti sektor.
Iti report, umun-una ti South Korea a source ti foreign arrivals a mapatta-patta nga umabot iti 26.66% wenno 1,505,251 a bisita, sumaruno ti Estados Unidos nga addaan ti 5.75% wenno 889,489 a bisita.
Maikatlo ti Japan nga addaan ti 6.51% wenno 367,747 a bisita idinto a maikapat ti China nga addaan ti 5.43% wenno 306,549 a bisitam ken maikalima ti Australia nga addaan ti 4.41% wenno 249,130 a bisita.
Karaman pay ti Canada, Taiwan, Singapore, United Kingdom, ken Malaysia a nangbukel ti top 10 sources ti foreign tourists iti pagilian.
