LAOAG CITY – Ngimmato iti 20 a puntos ti reading improvements ti Pilipinas maibasar iti kaudian a resulta ti 2025 Program for International Student Assessment.
Segun iti Department of Education (DepEd), ngimmato ti bilang dagiti estudiante a nakadanon iti Level 2 competency iti 31% manipud iti dati a 24%, a mangipasimudaag nga ad-adu dagiti estudiante nga addaan iti foundational reading skills.
Inlawlawag ti departamento a resulta daytoy dagiti reporma iti edukasion a mangipamaysa iti panangpapigsa iti basic literacy ken reading comprehension.
Gapu iti positibo a resulta, nagun-od ti DepEd Reform Agenda ti naan-anay a suporta manipud kadagiti mammanday-linteg, lider ti pagadalan, ken kakadua iti edukasion tapno ad-adda a mapapigsa dagiti napaut a solusion.
Impasigurado ti gobierno nga agtultuloy ti sistematiko a programa a mangpasayaat pay iti kalidad ti edukasion ditoy Pilipinas.
