LAOAG CITY – Nangipatulod ti Pilipinas iti note verbale wenno diplomatic protest iti China gapu iti kaudian nga insidente a napasamak iti Ayungin Shoal iti nagbaetan ti military ti Pilipinas ken China Coast Guard (CCG) idi Hulio 17.
Pinasingkedan ni Foreign Affairs Secretary Enrique Manalo ti pannakaipatulod ti note verbale iti maysa nga international media conference no sadino a napagsasaritaan ti isyu ti West Philippine Sea.
Segun ken ni Manalo, nakasaritanan ni Chinese Ambassador Huang Xilian seknan iti nasao nga insidente ngem nagkedked daytoy a mangted iti detalye no ania ti napagsasaritaanda.
Immuna a kinuna ni Department of Foreign Affairs Undersecretary Maria Theresa Lazaro iti Pulong Balitaan idiay Malacañang nga ikonsiderar ti Pilipinas ti panangpaayab ken ni Chinese Ambassador Huang Xilian mainaig iti insidente a naputed ti ramay ti maysa a marino ti Philippine Navy.
Inwaragawag ni Manalo iti Senate hearing a naituding a makipagkitada iti counterpart inton Hulio tapno pagsaritaanda ti insidente iti Ayungin Shoal.
Innayon ni Manalo a naglabsing ti napasamak nga insidente iti katulagan ni Presidente Ferdinand Marcos Jr. ken ni Chinese President Xi Jinping.
Kinunana pay nga aniaman a “maritime difference” iti nagbaetan ti dua a pagilian ket rumbeng a mapagsaritaan a nasayaat.
Kabayatanna, intaginayon ni Manalo a rumbeng a mapagsasaritaan ti agtultuloy a tension iti West Philippine Sea.
