LAOAG CITY – Ngimmato ti maysa a puesto ti Pilipinas iti 63rd iti 2026 Global Startup Ecosystem Index a naglippas iti uppat a nagsaruno a tawen a panagbaba ti ranggo.
Basar iti report ti StartupBlink, dimmur-as ti 11.7% ti startup ecosystem ti pagilian, nangatngato ngem iti world average a 10.3%.
Nupay kasta, al-alisto latta ti panagdur-as dagiti kaparanget a pagilian kas ti Vietnam (67.9%), Thailand (62.6%) ken Singapore (24.4%).
Inbatad ni Dr. Rogelio Alicor Panao ti University of the Philippines Diliman a senyales daytoy ti in-inot a panagbangon ti Pilipinas ngem kasapulanna pay a kumamat iti al-alsito a panagdur-as ti dadduma a pagilian iti rehion.
Maysa kadagiti kapigsaan nga aspeto ti Pilipinas ket ti kalawa ti startup ecosystem daytoy.
Naammoan a pito a siudad iti pagilian ti nakastrek iti listaan ti 1,000 a katibkeran nga startup cities iti lubong ti kaaddoan iti Southeast Asia.
Malaksid iti Metro Manila, dimmur-as iti startup activity iti Naga, Davao ken Cagayan de Oro idinto nga immuna a nakastrek iti listaan ti Iligan ken San Mateo.
