LAOAG CITY – Inalay-ayan ni Department of Trade and Industry (DTI) Secretary Cristina Roque ti panagdanag iti baet ti posible a panangpataw ti Amerika ti reciprocal tariff a mangrugi inton Abril 2.
Segun iti sekretario, saan a maapektaran ti pagilian iti daytoy gapu ta agkaalyado ti Pilipinas ken Amerika ken bassit laeng laeng ti trade deficit ti pagilian maipaan kadagiti ieks-export a produkto iti Amerika.
Basar iti reports, naikeddeng a mangipatungpal ti gobierno ti Estados Unidos ti reciprocal tariffs kadagiti pagilian nga addaan ti trade deficits nangruna kadagiti aglaklako ti ad-adu a goods iti Amerika nga imbes a gatangen manipud ditoy pagilian.
Sakbay pay a nagsubli iti White House, inrakuraken ni United States President Donald Trump nga ikkatenna ti saan a nainkalintegan a taripa nga inpataw iti Amerika ken papigsaen pay ti manufacturing sector-da.
Karaman kadagiti trading partners ti Estados Unidos a manarimaan a maar-arisit ti trade deficits ket ti Canada, Mexico, Brazil, the European Union (EU), Switzerland, Turkey, South Africa, India, China, Japan, South Korea ken Taiwan.
Naammoan a pakairamanan pay ti uppat a Southeast Asian economies nga Indonesia, Malaysia, Thailand ken Vietnam.
