LAOAG CITY – Inlawlawag ti Bureau of Plant Industry (BPI) ti Department of Agriculture (DA) nga awan ti ang-angkaten nga ube wenno purple yam ti Pilipinas manipod iti sabali a pagilian ken nagballaag kontra kadagiti aglaklako wenno agiwarwaras ti produkto a managibagbaga a daytoy ket “imported ube.”
Segun iti Bureau of Plant Industry, awan ti inaprubaran na a panagangkat ti presko nga ube isut gapuna nga agannad ti publiko kadagiti produkto a mailaklako kas imported.
Inparuk-at ti ahensya ti ballaag iti baet ti ngumatngato a demand iti international para iti ube ken gutgutiguten nga umili nga ireport a dagus ti aniaman a possible a panaglabsing.
Inpetteng pay ti Bureau of Plant Industry a mailabsing iti maipatpatungpal a plant quarantine regulations ti panagangkat ti presko nga agricultural products nga awan ti kasapulan a sanitary and phytosanitary clearances ken mabalin daytoy a mangitunda kadagiti peste ken sakit a makadadael iti lokal nga agrikultura.
Inpasigurado met ti National Plant Quarantine Services Division ti Bureau of Plant Industry (BPI) ti Department of Agriculture ti pannakaipatungpal ti naiget a border control ken panangsurot kadagiti regulasyon iti trade ti produkto a pang-agrikultura.
