LAOAG CITY – Awan ti plano ni Presidente Ferdinand “Bongbong” Marcos Jr. a patulan wenno agibales ti water cannon ti panangbomba ti danum ti China iti barko ti Bureau of Fisheries and Aquatic Resources a Datu Bankaw iti Bajo de Masinloc iti napalabas a lawas.
Inbatad ni Presidente Marcos iti maysa nga ambush interview iti Pasay a saan nga agusar ti water cannon ken awan ti plano ti Pilipinas a rumaut iti aniaman a pagilian.
Inpettengna a ti laeng ar-aramiden ti pagilian ket protektaran ti sovereign rights ken ti soberenya iti West Philippine Sea ken saanda a rumaut iti babaen ti water cannons wenno aniaman nga opensiba.
Maipalagip a nadadael ti barko ti Pilipinas gapu iti napigsa a water cannon nga inbomba ti barko ti China.
Gapu iti daytoy, inpaganetget ti Presidente a saanda a tuladen ti inaramid ti Chinese Coast Guard ken Chinese vessels gapu ta saan a misyon ti Navy wenno Coast Guard a mangirugi ti tension no di ket ti panangibaba ti tension.
Immuna iti daytoy, pinatawagan ti Department of Foreign Affairs ni Chinese Embassy of Manila Deputy Chief of Mission Zhou Zhiyong tapno agpalawag maipapan iti insidente.
Kabayatanna, mangisayangkat koma ti routine humanitarian mission iti Bajo de Masinloc ti barko ti Pilipinas idi kellaat a binomba ti danum daytoy ti China.
