LAOAG CITY – Umab-abot ti 300 agingga iti 400 Pilipino ti matmatay iti kada tawen gapu iti rabies idinto nga agarop 4 a milyon ti mairekrekord a makagkagat ti animal iti kada tawen.
Daytoy ti inbatad ni Philippines Los Baños College of Veterinary Medicine Associate Professor Dr. DJ Darwin Bandoy.
Segun kenkuana, kasapulan ti panangpapigsa ti public awareness ken vaccination efforts gapu ta nagtalinaed ti rabies kas kangrunaan nga health concern ti publiko, aglalo kadagiti pasyente a naklasipikar iti babaen ti Category 3 exposure, wenno high-risk bites, a kasapulan a mabakunaan a dagus.
Inlawlawag ni Bandoy a ti rabies ket saan a limitado kadagiti stray dogs, no di ket uray kadagiti bukod a taraken no saan da a mabakunaan.
Binalakadan na met dagiti pet owners a masapol nga obserbaren da no adda ti pagbalbaliwan ti panagug-ugali dagiti taraken da, aglalo kadagiti aso ken pusa.
