LAOAG CITY – Ngimmato ti 14.2 a porsiento ti bilang dagiti pamilia a Pilipino a nakapasar ti panagbisin ditoy pagilian, maibasar iti latest survey nga inruar ti Social Weather station a naisayangkat idi Marso 2024.
Ti nasao a porsiento ket nangato iti 10.7 a porsiento nga annual hunger rate idi 2023 kadagiti pamilia a mabisin ken awan ti makanda.
Basar iti datos, iti 14.2% ket adda ti pakabuklan a 12.2% a pamilia a Pilipino ti nakapasar ti “moderate hunger” ti sumagmamano a daras iti napalabas a tallo a bulan ken dua a porsiento met ti “severe hunger” wenno masansan ket makapaspasar ti panagbisin.
Ti moderate ken severe hunger idi Marso 2024 ket nangatngato idi Disiembre 2023 a dimmanon iti moderate hunger nga 11.2% ken severe hunger a 1.6 percent.
Ti hunger rate iti Metro Manila ti kangatoan a 19% no idasig iti 12.7% hunger rate iti National Capital Region idi Disiembre 2023.
Sinaruno daytoy ti Balance Luzon, 15.3%; Visayas, 15% idinto ti Mindanao ti nakairekord ti hunger rate nga 8.7% idi Marso 2023 manipod iti 12% idi Disiembre 2023.
Ti survey ket naiyuswat babaen ti face-to-face interviews kadagiti 1,500 adults.
