LAOAG CTIY – Gagangay laeng nga agamak dagiti tattao kangrunaan na kadagiti Pilipino iti napasamak a panagdungpar ti kotse a minaneho ti suspek a nakatayan met ti uppat a tattao ken nakasugatan ti 40 idiay Wenminster, London.
Daytoy ti nagbalin a kabibiang ni Mr. Rolly Lagutan, Chef iti Hotel idiay London ken residente ti Brgy 4 iti ili ti Sarrat.
Inbatad ni Lagutan nga agarup 20 a minotos ti kabayag ti biahe manipud ti lugar da agingga iti nakapasamakan ti insidente.
Inlawlawag na a dinungpar ti lalaki a nakalugan ti 4×4 dagiti grupo dagiti tattao a magmagna iti igid ti kalsada iti nasao a lugar ken idi bimmaba daytoy ket napan na binagko-bagkong ti maysa a police a poon ti nakatayan na.
Segun kenni Lagutan, saan a masigurado dagiti otoridad no maibilang a terror attack ti napasamak gapu ta may-maysa laeng ti suspek.
Maipalagip nga uppat dagiti natay a tattao karaman ti nasao a pulis ken natay met ti suspek kalpasan a pinaltogan dagiti otoridad.
Immuna metten nga indeklara ni Mayor Sadiq Khan a maysa daytoy a klase ti terror attack.
