LAOAG CITY – Adu dagiti residente agraman dagiti kailian a taga Ilocos Norte ti agsagsagaba ti panateng ken uyek idiay isla ti Hawaii.
Daytoy ti inpakaammo ni Bombo Correspondent Manny Pascua iti pannakiuman kenkuana ti Bombo Radyo Laoag iti paset ti Good Morning Philippines.
Kuna na nga uray isuna ket agpanateng gapu iti kinakaru ti lamiis ti lugar da iti agdama.
Segun kenni Pascua, mapaspasaran da pay ti sagpaminsan a napigsa a panagtudo iti nasao a lugar.
Mainaig iti daytoy, naapektaran pay ti trabaho dagiti Pilipino ken sabsabali a puli kangrunaan dagiti agmulmula ti nateng gapu ti kinalamiis ti tiempo
Innayon na a narigat nga agbunga dagiti mula a nateng iti pagtatalonan no nalamiis ti panawen.
Gapu iti daytoy, ngumina ti presyo dagiti nateng.
Ti Hawaii ti maysa kadagiti kangrunaan nga agisupsuplay ti nateng iti mainland ti Amerika.
