LAOAG CITY – Mapilaan ti kaso nga unauthorized driving, 1st degree assault against law enforcement officer ken 1st degree theft ti maysa a lalaki nga agtawen ti 28 idiay Hawaii.
Nabigbig ti suspek a ni Joshua Gamboa, maysa a Pilipino.
Basar iti report ni Bombo International News Correspondent Manny Pascua iti Hawaii, ti pannakaipila ti kaso kontra iti suspek ket namunganay kalpasan a ginandat na ti naglibas manipod kadagiti otoridad usar ti patrol car.
Kuna na a rinespondean dagiti pulis ti suspek kalpasan a nadesgrasya ti inturong na a lugan.
Nu pay kasta, kabayatan ti panangberipikarda ti plate number ti lugan ket naamoan a naggapo iti takaw isut gapu na a ginandat metten ti suspek ti naglibas.
Inbatad ni Pascua a nagtaray ti suspek agingga a nadanun na ti patrol carl ken isu ti inturong na para iti panngep na nga aglibas.
Gapu iti daytoy, inbaga ni Pascua a kinamat dagiti pulis agingga a naidungpar iti maysa a concrete barrier rason ti balligi a pannakakemmeg na.
Rumrumuar a wanted ni Gamboa gapu iti kaso a panaglabsing ti HOPE wenno Hawaii Opportunity Probation with Enforcement Program.
Inpakaamo ni Pascua a basar iti rekord dagiti otoridad ket nakonbiktaran pay ni Gamboa itay kallabes gapu iti kaso a panagtakaw ken panagabuso iti miembro ti pamilyana.
