LAOAG CITY – Nalimitaran ti panagturong dagiti Pilipino kadagiti simbaan idiay Italy kalpasan a nakaawat da ti pakaammo iti Sentro Pilipino Chaplaincy.
Iti report ni Bombo International Correspondent Demetrio Bong Rafanan ti Roma, saan nga inpasardeng ti Diocese of Rome dagiti maiwaywayat a misa iti kada Domingo ngem liklikan pay laeng dagiti maseknan nga agsagsagaba ti panateng, uyek ken gurigor ti agturong iti simbaan tapno saan da a mapagatapan nga addaan ti sakit a coronavirus disease.
Kuna na a saan pay laeng a maiyuswat dagiti spiritual exercise, pilgrimage, oratorio, retreat, pre-cana seminar ken dadduma pay.
Innayon ni Rafanan nga umaboten ti 3,296 dagiti apektado, 148 dagiti pimmusay ken 414 dagiti naagasan manipud ti COVID-19 iti intero nga Italya, idinto nga 40 ti apektado ti virus ken maysa ti natay idiay Roma.
