LAOAG CITY – Maysa a Pilipino nga adda idiay Fukuoka, Japan ti sinaludaran dagiti Japanese netizens gapu iti panangisalakan iti biag ti maysa nga ubing a malmalmes.
Idi Hunio 16, adda ti maysa a Japanese family a nag-fishing outing iti Hakozaki Wharf, maysa a sikat a recreational fishing spot kadagiti residente ti Fukuoka.
Agarup 5:10 ti malem, naisina ti buridek a lalaki nga anak ti nasao a pamilia ken aksidente daytoy a natnag iti baybay kabayatan a magmagna iti wharf.
Gapu ta daytoy ket saan a beach ken maysa daytoy nga industrial area, 6.6 a kadapan ti kangato ti nakatnagan ti ubing a mapan iti baybay. Iti kadayta a kanito, maysa nga agtawen iti 26 a Pinoy nga agdama nga adda iti lugar ti insidente. Idi makitana a natnag ti ubing, dagus daytoy a timmapuak tapno mapan isalakan daytoy.
Natalged a naisubli ti ubing iti pamiliana ken agpada nga awan ti sinagaba a sugat ti ubing ken ti Pinoy a nangisalakan iti daytoy. Naammoan dagiti otoridad a ti Pinoy ket agnanaed ita idiay Japan gapu ta dumaldalan iti maysa a technical trainee program.
