LAOAG CITY – Naiget ti panangtitinnulong dagiti Pilipino idiay Malaysia para kadagiti pada da a Pilipino a nagsardeng ti panagtrabaho na gapu ti coronavirus pandemic.
Iti pannakiuman ti Bombo Radyo Laoag kenni Mrs. Juncy Estavillo, domestic helper iti Kuala Lumpur, Malaysia, adu a Pilipino dagiti marigrigatan iti agdama kangrunaan dagiti naawanan ti trabaho.
Kuna na a dagiti pada na nga stay-in workers ket agtitinnulong a mangited ti makan kadagiti displaced workers.
Segun kenni Estavillo, pudno nga adda ti food assistance nga ited ti OWWA ngem marigatan da a mangibiyahe gapu ta naiget dagiti otoridad iti Malaysia.
Inbatad na a babaen ti maukkon a tulong ket dagiti Pilipino a frontliners ti mamngidanun ti tulong kadagiti OFWs a naapektaran ti virus.
Kabayatanna, inpakaammo ni Estavillo, a maipatpatungpal ti curfew manipud iti alas-singko ti malem ken alas-nuebe ti bigat, ken ti naiget a pannakatiliw ken mabalud dagiti awan ti importante a papanan na.
Inlawlawag na a nalimitaran ti panagruwar dagiti residente tapno saan nga agdupudop dagiti tattao ken tapno maliklikan ti panagwaras ti virus.
Mainaig iti daytoy, ikarkararag ni Estavillo a saan kuma a maiyalud-od ti lockdown ti Malaysia gapu ta marigrigatan da.
