LAOAG CITY – Nagduduma a costume ti arwat dagiti Overseas Filipino Workers idiay Mexico City para ti selebrasyon ti Halloween iti laksid ti didigra a pinasar da itay napan a bulan.
Segun kenni Mr. Josh Viernes, tubo ti Bacarra Ilocos Norte, maysa a mangisursuro idiay Mexico City, naragsak ti panangselebrar da ti Halloween ken naiwayat ti parada no sadino a nagparada dagiti kalansay nga addaan ti nagduduma a kolor ken adda pay dagiti nagarwat ti “kamatayan”.
Kuna na a saan met a nagpaudi dagiti ubbing a nagarwat ti nagduduma a nakabutbuteng a costume ken adda dagiti nagarwat ti nagduduma superhero costume.
Arig a nalipatan dagiti Pilipino ken dagiti Mexicans ti napasar da itay napan a bulan no sadinno a dimmayeg ti napigsa a gingined a nakatayan ti nasurok 300 a tattao ken narpoog ti sumagmamano a pasdek.
