LAOAG CITY – Inbatad ni Ms. Genenive Dignadice manipud idiay Moscow, Russia a natalged met ti kasasaad da a Pilipino nga adda iti nasao a pagilyan iti baet ti tensyon iti Russia ken Ukraine.
Segun kenni Dignadice, adda ti advisory ti gobierno ti Russia a mangibagbaga nga agbalin nga alerto ken agmonitor da iti sitwasyon kangrunaan na kadagiti adda iti conflict area.
Inlawlawag na met a kaadoan kadakuada a Pilipino nga adda idiay Moscow ket saan da a kayat ti agawid gapo ta awan met ti agur-uray kadakuada a trabaho ditoy pagilyan.
Kunana nga uray dagiti employers da ket patien da a saan a kumaro ti sitwasyon iti nagbaetan ti Russia ken Ukraine.
Inpetteng na a normal ti sitwasyon da iti nasao a lugar iti laksid ti maipadpadamag nga addang ti Russia.
Kabayatanna, uray ni Ms. Krystiel Marie Islao manipud met laeng idiay Moscow, Russia a normal met ti inaldaw a panagbiag da da.
Dinakamat na pay nga adda ti balakad ti Philippine Embassy idiay Russia a masapol agalerto da latta iti laksid a natalged ti nasao a ciudad.
Innayon na a basar iti embahada ket awan pay met ti rumbeng a pagamkan da nga OFWs iti nasao a pagilyan.
