LAOAG CITY – Nabalakadan dagiti Pilipino idiay South Korea a saan da pay laeng a mapmapan kadagiti paggaadoan dagiti ado a tattao tapno maliklikan ti sakit a Coronavirus.
Iti report ni International Correspondent Mercy Hachero, taga Coron, Palawan ken Presidente ti United Filipinos in Korea (UFILKOR) idiay Seoul, South Korea, inbatad na nga inbilin ti gobierno a liklikan da pay laeng ti mapan kadagiti pampubliko a lugar.
Inbatad na a kalpasan a naipadamag nga adda ti agtawen ti 66 a lakay a nagpositibo ti coronavirus a naggapo idiay China ket dagus da a kinataripnong dagiti miembro da ken nagsasaritaan da dagiti rumbeng a maaramid tapno maliklikan ti nasao a sakit.
Kuna pay ni Hachero nga idiay South Korea ket adda dagiti nagduduma nga organisasyon dagiti Pilipino ken tunggal adda ti kastoy a problema ket isuda a lider ti masansan nga agsasarita no ania ti mabalin da nga ibalakad kadagiti miembro da.
Innayon na a kanayun da metten nga agusar ti face mask tapno saan da nga alisto a maakaran ti nasao a virus.
