LAOAG CITY – Inrakurak ti Department of Agriculture a rugianen ti pannakaipatungpal ken pannakailako ti P20 iti kada kilo ti bagas iti Visayas region inton sumaruno a lawas.
Inaramid daytoy a rakurak kagiddan ti closed-door meeting pakairamanan ni Presidente Ferdinand Marcos Jr. ken 12 a Visayas Governors iti Kapitolio.
Naammoan a paset pay iti panagtataripnong ti pakpakauna a pannakaipatungpal ti inkari ni Marcos iti eleksion nga ibaba ti presio ti bagas iti P20 iti kada kilo.
Inbatad ni Department of Agriculture Secretary Francisco Tiu Laurel Jr. a manarimaan ti pannakikammayet ti nailian a gobierno iti babaen ti Department of Agriculture kadagiti local government units tapno maipatungpal ti programa.
Kuna ni Laurel, dua a template ti kitaenda no sadinno ti umuna ket 5 a kilo iti kada lawas iti tunggal pamilia ken ti maikadua ket 10 a kilo iti kada lawas.
