LAOAG CITY – Inpakaammo ni Brgy. Chairman Romulo Bartolome iti Brgy. 51-B Nangalisan West ditoy siudad ti Laoag nga addan ti dati a sagsagaben a sakit ni IN-C2222, agtawen ti 91 ken residente iti nasao a barangay sakbay a nagpositibo ti covid-19.
Inlawlawag ni Bartolome nga immuna a naipan iti Laoag City General Hospital ti pasyente gapu iti sakit ti puso.
Kuna na a kas protocol kadagiti ma-admit iti ospital ket dimmalan iti swab test ken nagpositibo daytoy.
Inbatad na a naiyakar met laeng iti Mariano Marcos Memorial Hospital and Medical Center iti siudad ti Batac ni IN-C2222 tapno maopera ngem pimmusay sakbay ti naituding nga operasyon na.
Kabayatanna, inpakaammo ti kapitan a negatibo ti resulta ti swab test ti anak ti pasyente a nangbanbantay kenkuana.
Nu pay kasta, kuna na dumalan daytoy ti panag-quarantine kas panangsurot iti protocol.
Innayun na a malaksid iti nangbanbantay iti pasyente ket negatibo amin ti resulta ti swab test dagiti dadduma a kapamilya na.
Niipatulod idiay Vigan City, Ilocos Sur ti bangkay ni IN-C2222 tapno dumalan iti cremation.