LAOAG CITY – Inlawlawag ni Barangay Kagawad Juanita Atabay, Chairman ti Committee on Health iti Barangay 20, San Jose iti ili ti Sarrat a ti pimmusay a ni IN-C2529 ket diabetic ken adda ti hypertension.
Segun kenni Atabay, napan nagpacheck up ti pasyente ken dimmalan iti swab test ken bayat a maiyur-uray ti resulta ket nag-isolate iti civic center iti ili da.
Inlawlawag na nga iti malem ti Mayo 24 ket marigatan nga umanges ni IN-C2529 rason a naitaray iti ospital.
Kunana a karaman kadagiti nakapulapol ni IN-C2529 ket ti pamilya ken karruba na nga umabot iti 15 nga indibidual.
Naamoan nga ummuna a nagpositibo iti covid-19 ti kabsat ni IN-C2529 ngem iti agdama ket nalainganen.
Saan met a maibaga ni Atabay no kasano a naakaran ti virus ti pasyente pakairamanan ti kabsat na gapo ta saan da met unay a rumrumuar.
Kabayatanna, kuna ni Brgy. Chairman Bernardo Ganitano iti nadakamat a barangay a naitabon ti bangkay ni IN-C2529 iti public cementery partikular iti nailatang a lote a pakaipanan ti pumusay a covid-19 patient.
Inbatad na a sakbay a naamoan da a pimmusay ni IN-C2529 ket mapan kuma pay laeng iti ospital ti maysa kadagiti anak na.
