LAOAG CITY – Kinumpirmaran ni Brgy. Kagawad Jonathan Domingo iti Brgy. 13 iti ili ti San Nicolas a pimmusayen ni IN-C2607, agtawen ti 68 a baket ken residente iti nasao a barangay.
Kuna ni Domingo a pimmusay ti pasyente bayat nga adda iti ospital.
Inlawlawagna nga immuna a dimmalan iti antigen test ti pasyente ken nagpositibo daytoy.
Kalpasanna ket dimmalan iti RT-PCR test para iti confirmatory test ken kas panangsurot ti protocol kadagiti maipan iti ospital ken positibo ti resulta daytoy.
Immunan nga inlawlawag ti kagawad a ni IN-C2607 ket addan ti dati a sagsagabaen na a sakit ken dumaldalan ti dialysis.
Kabayatanna, kuna ni Domingo a saan pay a masinunuo nu nakaalaan ti pasyente ti virus.
Innayun na a negatibo met ti resulta ti swab test dagiti nagbalin a primary contact ti pasyente.
Inpakaammo ti kagawad a dimmalan metten iti cremation ti bangkay ni IN-C2607.
