LAOAG CITY – Inpakaammo ni Brgy. Chairman Florentino Vega iti Brgy. Tamdagan iti ili ti Vintar nga addan ti dati a sagsagabaen a sakit ti pimmusay a ni IN-C3190, agtawen ti 84 ken residente iti nadakamat a barangay.
Segun ken ni Vega, adda ti asthma ti pasyente ken sakit iti prostate.
Kuna na a kas protocol ti ospital, dimmalan iti testing ti pasyente apaman a na-admit ken nagpositibo iti covid-19.
Nu pay kasta, inbatad na a bayat ti panagtalinaed ti pasyente iti ospital ket dita metten a saan a kinabaelan ti bagi na dagiti sagsagabaen na a sakit ken pimmusay.
Dagus a naipan iti probinsya ti Ilocos Sur ti bangkay ni IN-C3190 para iti cremation ken naiyawiden ti dapo na idi kalman.
Kabayatanna, inbatad ni kapitan Vega a nagpositibo met iti virus ti nangbantay iti pasyente bayat nga adda iti ospital.
Innayun na a manamnama a dumalan iti test ti nakapulpulapol dagiti nagpositibo a pasyente.
