LAOAG CITY – Kinumpirmaran ni Brgy. Chairwoman Nora Aragon iti Brgy. Pias Norte iti ili ti Currimao a nabayagen nga adda ti sagsagabaen a sakit ni IN-C3807, agtawen ti 78 a baket ken residente iti nasao a Barangay.
Segun kenkuana, adda ti sakit a diabetes ti pasyente malaksid iti panagpositibo na ti covid-19.
Inbatadna nga nakaro ti uyek daytoy ken addan ti sumagmamano a bulan a masaksakit.
Inlawlawag ni Aragon a plano ti pasyente a mapan iti maysa a pribado nga ospital idiay Sinait Ilocos Sur tapno agpakonsultar ngem naitantan kalpasan a nagpositibo ti resultana iti antigen test iti Badoc Border Control rason a napasubli.
Gapu iti daytoy, kuna na a nagdesision ti pamilya ti pasiente a maipan daytoy iti Mariano Marcos Memorial Hospital and Medical Center iti siudad ti Batac gapu iti panagkapsot ti bagina.
Inbatad na nga immuna a dimmalan ti RT-PCR test ti pasyente kas mandatory requirement iti nasao nga ospital ken dita a nagpositibo iti COVID-19.
Nu pay kasta, kuna na a pimmusay ni IN-C3807 bayat a matamtaming iti ospital.
Inpakaammo ni Aragon a dagus a na-cremate ti bangkay ni IN-C3807.
Kabayatanna, kuna ti kapitan a maiyur-uray ti resulta ti swab test ti dua a kabbalay ti pimmusay idinto a manamnama a dumalan iti test ti uppat pay a kabaygan na a nadeterminar kas primary contacts.
