LAOAG CITY – Saan a mailadawan ni Atty. Marvinson Dalayap iti Barangay 11 iti ili ti San Nicolas ti napalalo a ragsak na iti pannakapasa na iti bar exams.
Inistorya na iti Bombo Radyo Laoag nga ado a rigat ti nagpasaran na kangrunaan na idi adda pay laeng iti Law School sakbay a naragpat na ti arapaap na nga agbalin a naan-anay nga abogado.
Kuna na nga ad-adda manen ti rigat na kabayatan ti panagreview na para iti bar examinations idi nobyemre itay napan a tawen.
Inbatad na a nagasat idin no makaturog iti uppat nga oras gapu iti kaado dagiti nasken a basaen na.
Segun kenkuana, ti kangrunaan a nagbalin nga igam na a nanglaban kadagiti napaspasaran na a rigat ket ti pamilya na kangrunaan na ti ina na gapu ta isuna ti numero uno a nangmotivate kenkuana tapno lumaban ken saan pulos a sumuko tapno maragpat ti kalikagom na a pagbalinan.
Nupay kasta, pimmusay ti ina ni Atty. Dalayap idi ag-4th year iti Law School gapu iti breast cancer.
Mamati ni Atty. Dalayap a naragsak ti ina na iti ayan na iti agdama gapu ta naan-anayen a maysa nga abogado.
Ni Atty. Marvinson Dalayap ket nagturpos iti Law School iti Mariano Marcos State University (MMSU) iti ciudad ti Batac.
