LAOAG CITY – Nakastreken iti 2024 Paris Olympics ti Pinay Fencer a ni Samantha Catantan kalpasan a nangabak daytoy ti Asian and Oceania Olympic Qualification Tournament idiay Fujairah, United Arab Emirates.
Iti baet nga adda ti rikriknaenna a sakit iti tumengna, naaramid ni Catantan nga ipangabak ti finals kontra iti pannakabagi ti Kazakhstan a ni Sofia Actayeva iti iskor a 15-14.
Basar iti University Athletic Association of the Philippines (UAAP), 34 a tawen nga awan ti pambato ti Pilipinas iti fencing iti Olympics isu nga nangipadanon ti nabara a panangkablaaw iti nasao nga atleta. Ni Catantan ket dati nga atleta iti University Athletic Association of the Philippines a nagay-ayam para iti University of the East.
Gapu iti daytoy, isuna ti maika-12 a Pilipino nga atleta a kualipikado para iti 2024 Paris Olympics.
Makaduana ditoy da pole vaulter a ni Ej Obiena; dagiti boksingero nga isuda Nesthy Petecio, Aira Villegas ken Eumir Marcial; gymnasts nga isuda Carlos Yulo, Aleah Finnegan ken Levi Jung-Ruivivar pakairamanan da weightlifters nga isuda Vanessa Sarno, Elreen Ando ken John Ceniza kasta pay ken ni Joanie Delgaco.
