LAOAG CITY – Inpakaammo ni Mrs. Suprema Corpuz, agnanaed iti London, United Kingdom a nagtalinaed iti pagilian nga Australia kalpasan a nadanunan ti lockdown gapu ti coronavirus pandemic.
Kuna na a naggapu iti Pilipinas itay napan a tawen ken agtalinaed iti Australia ti tallo a bulan.
Segun kenni Corpuz, agawid kuma idi Marso ngem naitantan iti Abril 7 ngem saan a natuloy gapu ti mapaspasaran a krisis iti intero a lubong.
Gapu iti daytoy ket naikkan ti libre a visa a maysa a tawen kas pannakaiyalud-od ti panagtalinaed na iti Australia.
Inlawlawag ni Corpuz a ti maysa a british citizen ket maipaayan da ti libre a visa iti maysa a tawen ngem masurot ti kada tallo a bulan a panagtalaw iti Australia.
Nagturong ni Corpuz iti Australia para iti personal a kumikom na.
Mainaig iti daytoy, dinayaw ni Corpuz a napintas ti pagalagadan iti nasao a pagilian ken naikkan ti 750 a dolyar dagiti marigrigatan a residente.
Kuna na a maiparit rumwar no awan ti importante a pagturongan ken adda ti multa na.
Inbatad ni Corpuz nga adda dagiti pulis nga agpatpatrolya, ken limitado iti dua dagiti aglugan iti kotse, nasken nga adda ti identification no mapan kadagiti supermarket ken ti social distancing.
Innayon na a limitado pay ti mabaling a gatangen dagiti residente kas maysa a kilo laeng ti bagas ti mabalin a magatang ti maysa a tao kasta met dagiti toilet papers.
