LAOAG CITY – Inyestorya ni Ms. Gloria Sarmiento, iti Hamilton Bermuda, tubo iti Aring, Badoc, Ilocos Norte ti kasasaad na idi naidalan iti quarantine gapu ta maysa kadagiti naistranded iti isla ti Hawaii.
Inlawlawag na a nagturong iti Las Vegas, Nevada ken iti isla ti Hawaii itay kallabes ngem naistranded da sakbay nga agawid iti Bermuda Island.
Kuna ni Ms. Sarmiento a nakaawat ti mensahe manipud iti gobyerno ti Bermuda a maipalugan da iti special flight para kadakuada a naistranded iti Estados Unidos ken nakasangpet idi Abril 7, 2020 idiay Bermuda.
Inbatad na nga a naipadalan da iti screening idi nakasangpet da iti Bermuda ken nagtalinaed da iti 14 nga aldaw iti maysa nga hotel ken naipadpadalan da iti nagduduma a testing.
Segun kenni Ms. Sarmiento, naiget ti panagronda dagiti otoridad iti isla da, ken adda ti schedule ti panaggatang iti grocery.
Naurnos iti alphabetical ti nagan dagiti mabalin a gumatang iti grocery manipud iti Lunes agingga iti Biernes idinto a ti aldaw ti Sabado ken Domingo ket para kadagiti senior citizen.
Innayon na nga umaboten ti 110 ti kaso ti coronavirus, 44 dagiti nalaigan ken innem dagiti pimmusay ken ti kaudian a biktima ket maysa a senior citizen a nagyan iti nursing home.
