LAOAG CITY – Inbatad ni Mrs. Graynne Angel Edralin Panitan, taga Dagupan City, Pangasinan ngem agdama nga agtrab-trabaho idiay Riyadh, Saudi Arabia nga agpapan ita ket saan pay laeng a mamati a daytoy ti kaunaan a Pilipina a naikkan ti lisensya nga agmaneho idiay Saudi.
Iti eksklusibo nga interview ti Bombo Radyo Laoag ken ni Panitan, naamoan nga uppat a tawen na pay laeng idiay Saudi Arabia ken agpapaay daytoy kas Medical Admin Coordinator iti King Saud University Medical City.
Segun ken ni Panitan, saanna pulos a ninamnama a daytoy ti kaunaan a pinay a naikkan ti lisensya nga agmaneho idiay Saudi Arabia gapu ta nabayag a nagaplikar ken saanna a sineryoso.
Kuna na a dakkel a tulong kenkuana ti kaaddan ti dati a driver’s licence na manipod ditoy Pilipinas.
Inlawlawag ni Panitan a nalaklaka laeng ti mangala ti lisensya nga agdrive idiay Saudi Arabia no adda ti driver’s licence manipod ditoy pagilyan gapu ta agdrive-test laeng ken no maipasa ket maikkanen a dagus ti lisensya nga agmaneho ti nasao a pagilyan.
Innayon na a no awan ti sigud a driver’s licence ket ad-ado laeng dagiti procedure a pagdalanan gapu ta kasapulan pay laeng nga ag-training ti sumagmamano a bolan, dumalan iti written exam ken dadduma pay.
Inadmitir na a sipud nairakurak daytoy a kaunaan a pinay a nakaala ti lisensya nga agmaneho idiay Saudi Arabia ket nakaad-adon dagiti positibo a mensahe a maaw-awat na manipod kadagiti pada na met laeng a Pilipino.
Inpakaammo ni Panitan a kalpasan a nakaala ti driver’s licence ket ado metten dagiti Pilipina a nagsasaruno a napan nagaplikar.
