LAOAG CITY – Dakkel a pakaidayawan dagiti amin a Pilipino ti pannakaipaay ti pammadayaw iti maysa a pinay nurse a kaunaan a nangitudok ti covid-19 vaccine idiay United Kingdom (UK).
Daytoy ti report ni Bombo International News Correspondent Greg Pasalodos iti UK.
Inbatad ni Pasalodos a ti pinay nurse a ni May Parsons ket agpapaay iti National Health Service idiay UK ken isuna ti kaunaan a nangitudok ti covid-19 vaccine no sadinno a ti binakunaan na ket ti baket a ni Margaret Keenan idi disyembre 8, 2020.
Ti George Cross a kangatoan a pammadayaw a maipapaay kadagiti sibilyan idiay UK ti naipaay ken ni Parson nga inyawat a mismo ni Queen Elizabeth II ken binayabay daytoy ni Prince Charles, ti Prince of Wales.
Kabayatanna, inpakaammo ni Pasalodos nga umad-ado manen ti kaso ti covid-19 iti nasao a pagilyan gapu iti possible a panagdudupudop dagiti ospital idiay UK.
Kuna na nga awanen ti agus-usar ti face mask iti nasao a pagilyan.
Gapu iti panagngato manen ti kaso ti covid-19 idiay UK ket inbalakad ti gobierno a masapol a dagiti agtrabtrabaho kadagiti ospital ket isubli da ti agusar ti face mask.
