LAOAG CITY – Kalikagum ti maysa nga anak ti oversease Filipino worker a makaawid ti ina na ditoy pagilian.
Gapu iti daytoy, agkidkiddaw ti tulong ni Ms. Jovelyn Gervacio a residente iti Brgy. Foz iti ili ti Dingras gapu ti pannakamaltrato ti ina na babaen iti amo na idiay Saudi Arabia.
Kuna na nga idi nakasangpet iti nasao a pagilian ti ina na a ni Elizabeth Gervacio ket sabali ti napanan na nga employer.
Segun kenni Gervacio, inpakaammo ti ina na nga idi immuna a panagtrabaho na ket nasayaat dagiti amo na ngem iti panaglabas ti panawen ket saanen a nasayaat ti pannakatrato na.
Inbatad na nga adda pay ti gundaway a baoten da ti ina na usar iti landok ken madangdangran babaen iti anak ti amo na nga agtawen ti lima.
Kuna pay ni Ms. Gervacio a basar iti ina na ket iduldulin ti amo na dagiti makan kas iti bagas ken alaen da ti cellphone na.
Inpakaammo na a nagngudon ti dua a tawen a kontrata ti ina na idi Mayo 31.
Saan a nakaawid ti ina na gapu ti COVID-18 pandemic, kasta met a saan a kayat dagiti amo na a makaawid daytoy.
Kuna na a basar iti employer, Pebrero 2021 a makaawid ti ina ngem kayat na ti insegida a makaawiden gapu ta marigrigatan daytoy.
Innayon ni Gervacio nga 17 nga oras ti panagtrabaho ti ina na nupay nagngudon ti kontrata na.
Kabayatanna, immunan a nagpakaammo nti OFW iti agency na seknan iti sitwasyon na kadagiti amo na.
Masansan met ti panagtawag ti ina na kenkuana ken agpatpatulong kadagiti kakabsat na nga adda idiay Metro Manila.
Nagpatulong pay ni Ms. Gervacio iti Bombo Radyo Laoag gapu ta maipagarup a saan nga agsungsungbat ti agency ti ina na idiay Manila.
