LAOAG CITY – Naiget ti panagsanay iti ili ti Pinili para iti mapaspasangasangan a Tan-ok ni Ilocano Festival of Festivals 2026.
Inpasingked ni Vice Mayor Maynard Francis Bumanglag a napintas ken naidumduma a performance ti isagsagana dagiti performers iti ili ti Pinili.
Inbatadna a nangala pay dagitoy dagiti experts a mangsanay kadagiti makisalip tapno ad-adu pay dagiti ideya a mabukelda.
Inlawlawagna nga iti ili ti Pinili ket saan met nga agpaatiw iti nasao a naindaklan a dance competition ditoy probinsia.
Kunana nga aniaman ti agbalin a puesto a magun-odda ket dakkelen a pagyamananda gapu ta ti napateg ket naragsak ken inaramid ti amin a kabaelan dagiti performers-da.
Mainaig iti daytoy, maragsakan ti Bise Mayor gapu iti suporta nga ipapaay ken ipakpakita dagiti nagannak ken barangay officials iti rinabii a panagsanay dagitoy.
Mangnamnama daytoy nga agbunga ti napintas a resulta dagiti rigat ken sakripisio nga ar-aramiden iti tunggal maysa kadakuada.
Maipalagip a maisayangkat ti Tan-ok ni Ilocano Festival of Festivals 2026 inton Pebrero 28, 2026.
