LAOAG CITY – Bimmaba ti bilang dagiti marigrigat a Pinoy iti napalabas a tawen 2023.
Basar iti datos ti Philippine Statistics Authority, bimmaba ti 10.9% ti poverty incidence kadagiti pamilia a Pilipino idi 2023 manipud iti 13.2% idi 2021.
Katukad daytoy ti 109 iti kada 1,000 a pamilia a maawagan a nakukurapay.
Maipapan iti populasion, bimmaba met ti marigrigat iti 15.5% manipud iti 18.1% idi 2021.
Segun ken ni Philippine Statistics Authority Chief ken National Statistician Dennis Mapa, katukad daytoy iti 17.54 a milyon ti bilang dagiti marigrigat a Pilipino idi 2023 a nababbaba iti 2.36 a milyon a nairekord idi 2021.
Naammoan a ti Metro Manila latta ti kababaan a poverty incidence a dumanon iti 1.8% idinto ti BARMM ket addaan ti kangatoan a poverty incidence a dumanon iti 32.4%.
Mainaig iti daytoy, ti average poverty threshold para iti pamilia nga addaan ti lima a miembro idi 2023 ket dumanon iti P13,873 iti kada bulan a nangatngato iti 15.6% maidasig idi 2021.
Kabayatanna, bimmaba met iti 4.84 a milyon ti bilang dagiti Pilipino a “food poor” idi 2023.
