LAOAG CITY – Nakasaganan a sangoen ni Filipino MMA fighter Jeremy “The Juggernaut” Pacatiw ti kalabanna a ni Enkh-Orgil Baatarkhuu.
Naikeddeng ti laban ti dua inton Marso 8 iti Lumpinee Stadium idiay Bangkok, Thailand.
Naammoan a ti makalaban koma ni Pacatiw ket ti Russian MMA fighter a ni Ibragim Dauev iti napalabas a lawas ngem saan daytoy a natuloy gapu iti weight difference iti nagbaetan ti dua a fighter.
Nagtulag ti One Championship a pagsangoen da Pacatiw ken Baatarkhuu inton umuna a lawas ti Marso.
Inbatad ni Pacatiw, uray saan a natuloy ti umuna a labanna iti naglabas a lawas ket ikonkonsiderarna latta a ‘perfect timing’ ti agbalin a labanna.
Napagtalinaed ti kampona ti panagsagsaganada para iti aniaman a laban sakbay pay a nairakurak a kalabanenna ti Mongolian fighter.
Kuna pay ni Pacatiw, iti baet nga ikonkonsiderarna ni Baatarkhuu kas maysa a napigsa a kalaban, inpasingked ti Pinoy fighter nga aramidenna ti amin a kabaelanna tapno maabak ti agtawen ti 36 a kickboxer.
