LAOAG CITY – Addan ti resolusyon ti Provincial Prosecutors Office (PPO) mainaig ti kaso nga inpila ti Philippine National Police (PNP) seknan ti pannakatay ni Marcos Mayor Arsenio Agustin.
Maipursige ti kaso kontra kada dati a Mayor Jessie Ermitanio, Hardy dela Paz, alyas ardie, Jose Dato alyas Espanyol, ken Bernie Lazo alyas Bayaw.
Segun ti PPO, dagiti kaso a maipila kadagiti nasao a suspek ket murder para iti pannakatay da Agustin ken Rusmar Valencia idinto nga attempted murder para iti pannakapaltog da Nolan Valencia ken Camilo Vasquez.
Naamoan a ti kaso a murder kontra kenni Renato Esta alyas Rene ket nadismis gapo ti kinakurang ti ebidensya.
Maipalagip a namunganay ti pannakaipila ti kaso kontra kadagiti suspek kalpasan nga intudo ni Bayaw ni Ermitanio a daytoy ti “master mind” iti pammaltog idiay Brgy. Mabuti iti ili a Marcos a nakatayan da Agustin ken Valencia ken nakasugatan da Nolan Valencia ken Vasquez.
Ti agdama ket nakabalod dagiti suspek iti Ilocos Norte Provincial Jail (INPJ) ken Bureau of Jail Management and Penology ditoy ciudad ti Laoag.
