LAOAG CITY – Saan nga umanay ti piso a nayon a plete para kadagiti traditional jeepney.
Daytoy ti inpaganetget ni Mr. Wilmer Ariem a maysa kadagiti jeepney drivers iti ruta a Laoag-Batac-Paoay.
Segun kenkuana, arig saan a marikna ti gatad a mainayon a plete gapu ta bassit daytoy para kadakuada nga agpaspasada nangruna ket agtultuloy ti panagngato ti presio dagiti produkto a petrolyo.
Gapu iti daytoy, mangnamnama ni Ariem a maipaay ti fuel subsidy kadakuada iti kabiitan a panawen.
Inbatadna a pudno a nadagsen ti panagpasadada kadagitoy a gundaway gapu ta arig awanen ti mabati ti mapasadaanda iti kinangina ti presio dagiti produkto a petrolyo.
Inlawlawagna nga awan met pay ti naawatda a pammilin manipud iti Land Transportation Franchising and Regulatory Board mainaig iti pannakaipatungpal ti nayon a plete isut gapuna a ti 2022 fare guide pay laeng ti manarimaan a sursurotenda.
Kunana nga iti agdama ket umabot iti 45 a pisos ti regular fare manipud ditoy siudad ti Laoag agingga iti ili ti Paoay idinto a 35 a pisos met para kadagiti estudiante.
Maipalagip nga inrakurak ni Department of Transportation (DOTR) Secretary Giovanni Lopez a naaprobaranen ti piso a fare hike para kadagiti traditional ken modern jeepney.
